ريال مدريد يبدأ التجهيز لكأس العالم وتشابي ألونسو على رأس المشروع
ريال مدريد قرر ياخد خطوات سريعة وواضحة عشان يكون جاهز قبل بداية كأس العالم للأندية، وده حسب تقرير شبكة Relevo اللي أكدت إن الأمور ماشية بمنتهى الجدية داخل أسوار النادي الملكي.
أول قرار ناري كان تعيين تشابي ألونسو مدير فني للفريق، وهيبدأ مهمته رسميًا من 1 يونيو الجاي، وده بعقد مدته ثلاث سنين ويعني المدرب الإسباني الأسطوري هيكون موجود من أول لحظة في البطولة العالمية، وده أول اختبار حقيقي ليه مع الريال بعد نجاحه مع باير ليفركوزن.
مش بس كده، النادي كمان ضم لاعب مهم جدًا وهو أرنولد، والصفقة تقريبًا خلصت، مستنيين الإعلان الرسمي بس وإدارة الريال بتحاول تخلص أوراقه قبل المونديال مش بعده، وده معناه إنهم شايفين اللاعب كقطعة أساسية في المشروع الجديد.
أما بخصوص سوق الانتقالات، فالإدارة حطت عينها على مركزين مهمين جدًا: قلب الدفاع والظهير الأيسر والغيابات والإصابات اللي حصلت الموسم ده خلت النادي يحطهم على قمة الأولويات، عشان الفريق يكون متوازن وواقف على رجله في كل البطولات.
اللي واضح كمان إنهم مش هيقفوا عند الصفقات دي بس، لو في فرصة يضموا اسم قوي تاني مش هيترددوا، بس الأهم دلوقتي هو الجاهزية البدنية والتكتيكية قبل انطلاق البطولة.
ريال مدريد بيحاول يدخل الموسم الجديد بطاقة متجددة، ومشروع كبير بقيادة نجم من أبناء النادي.. والتوقعات كلها بتقول إننا داخلين على موسم مختلف تمامًا.
