فليك يقلب حال برشلونه ويكسب الكلاسيكو ويشعل المنافسه على الليغا
برشلونه مش بس فاز على ريال مدريد 4-3 في كلاسيكو ناري، لأ، دا كمان أكد إنه راجع بقوه ومش ناوي يسيب حاجه للمنافسين، ودا كله بفضل المدرب الألماني هانز فليك اللي قلب شكل الفريق فوق تحت.
الفريق الكتالوني بقي بيكسب الريال ف كل مواجهه، من السوبر للكأس وأخيرا الدوري، وكل دا من غير ما يشتري نجوم سوبر، وده اللى خلّى الناس كلها تتكلم عن فليك إنه “رجل الموسم” بجداره.
لامين جمال بسم الله ماشاء الله، مولعها نار بـ16 جول و24 اسيست، ورافينيا مش سايبه حاجه، جاب 34 جول وصنع 25، وطبعا بيدري اللى دوره لا يمكن يتنسي، بس مع كل ده، الإعلام الإسباني شايف إن فليك هو النجم الحقيقي.
الصحفي غونزالو ميرو قالها بصراحه: “فليك غيّر برشلونه من فوق لتحت”، وحتى الحارس المعتزل سانتي كانيزاريس شاف إنه قدر يخلّي برشلونه أقوي فريق في الليغا من غير ما يغير كتير ف اللعيبه.
الناس شايفه إن فليك عمل إنجاز كبير وسط ظروف صعبه، مادياً ورياضياً، ورجع البريق للفريق من تاني، وخلّي الجماهير تحلم بالبطولات تاني.
اللى حصل مش صدفة، دا شغل مدرب عارف هو بيعمل إيه، وفاهم قيمة القميص اللى بيدربه.
