فليك جدد عقده مع برشلونه لحد 2027 وسط إحتفال كبير
بعد الفوز المجنون لبرشلونه على ريال مدريد 4-3 في الكلاسيكو، كانت الإحتفالات مولعه ف كل حته، بس المره دي كان فيه سبب تاني يخلي الفرحه مضاعفه.
صحيفة “موندو ديبورتيفو” الكتالونية قالت إن المدرب الألماني هانز فليك احتفل بطريقه خاصه جدًا، مش بس علشان الفوز، لكن كمان علشان وقّع على عقده الجديد مع برشلونه لحد يونيو 2027.
القصه بدأت لما فليك خرج من الكامب نو، وراح على مطعم فاخر إسمه “بوتافوميرو” في برشلونه، ومعاه وكيله بيني زاهافي وكام صديق، وهناك إنضم ليهم رئيس النادي لابورتا.
الناس كانت فاكره إنهم بس بيحتفلوا بالفوز ع الريال، لكن الحقيقه إنهم خلصوا كل التفاصيل الخاصه بتجديد عقد فليك، واللي كان بدأ التفاوض عليه من كام أسبوع.
العقد الجديد هيمد بقاء فليك مع البارسا لسنتين إضافيتين، لحد صيف 2027، وده من غير أي بنود تمديد تلقائي. فليك أصلاً مش بيحب العقود الطويله، وقال قبل كده إنه يفضل عقود قصيره علشان تكون مرنه أكتر.
ورغم إنه عنده عقد لحد 2026، لكنه وافق على التمديد بشرط إن العقد مايكونش مفتوح على فترات طويله.
في سن الستين، فليك عايز يشتغل بفتره محدده ومريحه، وده اللي اتفق عليه مع الإداره.
الاعلان الرسمي للتجديد لسه ماحصلش، بس متوقع يتم بعد ما الفريق يضمن رسميًا لقب الليغا، ووقتها هتكون الفرصه مثاليه للإعلان قدام الجمهور.
