الحكومة بتتحرك بجد مبادرة لتحويل عربيات البنزين للغاز الطبيعي
في خطوة جديدة من الحكومة عشان تشجع الناس تسيب البنزين وتتجه لحلول أنضف وأوفر، عقد النهارده الدكتور مصطفى مدبولي، رئيس مجلس الوزرا، اجتماع مهم بحضور وزرا ومسؤولين كبار، منهم أحمد كجوك وزير الماليه، وكريم بدوي وزير البترول، وكمان عصام عمر من البنك المركزي.
الاجتماع ده كان بخصوص مبادرة تحويل العربيات إنها تشتغل بالغاز الطبيعي بدل البنزين، واللي بتيجي ضمن توجيهات الرئيس السيسي اللي دايمًا بيدعم التحرك ناحيه الطاقه النضيفه.
مدبولي قال في بداية الاجتماع إن الموضوع مش بس توفير فلوس، لكنه كمان بيخدم البيئه وبيقلل التلوث، وده بيخلي الدولة تلتزم بالمعايير البيئيه اللي العالم كله بيدور عليها دلوقتي وأكد إن اللي هيحول عربيته للغاز الطبيعي هيستفيد كتير جدًا، وحيحس بالفرق في مصاريفه الشهريه.
ومن الحاجات المهمه اللي اتقالت كمان، إن الحكومة ناويه تسهل كل حاجه، من أول توفير محطات غاز أكتر، لحد تسهيل الإجراءات للقطاع الخاص عشان يعمل محطات تموين أكتر.
المستشار محمد الحمصاني، المتحدث الرسمي، قال إن المرحلة الأولى من المبادرة هتبدأ في سنة 2025/2026 وهتشمل تحويل 50 ألف عربية، وبعدين الرقم ده هيوصل لـ220 ألف عربية لحد سنة 2028 والمفاجأة إن الوفر اللي هيحققه المواطن شهريًا لو استخدم الغاز بدل البنزين ممكن يوصل لـ2270 جنيه!
والحكومه كمان هتطلق منصه إلكترونية، يقدر أي مواطن يدخل عليها ويسجل عربيته عشان يبدأ إجراءات التحويل وبعد الكشف الفني والموافقه، هيوقع المواطن على العقد، والدولة هتشيل جزء من التكلفة، والباقي المواطن هيدفعه بالتقسيط و”من غير فايده”، ودي نقطه مهمه جدًا.
الخلاصه إن الحكومة فعلاً بتاخد خطوات حقيقيه في طريق الطاقة النظيفه، والمبادرة دي فرصه لأي حد عايز يوفر فلوس البنزين ويخلي عربيته صديقة للبيئة.
