تشابي ألونسو يختار كامينفورتي لتجديد القوة البدنية في ريال مدريد
واضح إن تشابي ألونسو مش ناوي يضيع وقت في خطته لتجديد ريال مدريد، وبدأ فعليًا يكوّن جهازه الفني الجديد، وأول قرار كبير ليه كان جاي من قلب ليفركوزن: إسماعيل كامينفورتي، اللي اختاره عشان يكون المعد البدني الجديد للفريق الملكي بدلًا من الأسطورة أنطونيو بينتوس.
كامينفورتي مش اسم عادي، ده كان واحد من الأعمدة الأساسية في نجاح باير ليفركوزن الموسم اللي فات، واللي توّج بلقب الدوري الألماني لأول مرة في تاريخه، وبدون ولا خسارة! ده رقم مش قليل خالص.
الراجل بدأ شغله في ليفركوزن سنة 2021، وجاي من خلفية قوية جدًا، خدم سبع سنين في برشلونة “ب”، واشتغل في أمريكا مع نيويورك سيتي، وكمان كان ضمن طاقم المنتخب الدنماركي ويعني خبره محترمة جدًا، وشايل شنطة مليانة علم وتجارب.
ومن يوم ما مسك الشغل البدني في الفريق الأول سنة 2022، الإصابات العضلية قلت بشكل ملحوظ، وده كان سبب كبير في استقرار ليفركوزن وتماسكه البدني الموسم كله.
تشابي ألونسو شايف إن كامينفورتي هو المفتاح اللي هيساعده يبني فريق قوي بدنيًا، خصوصًا إن ريال مدريد واجه مشاكل كبيرة في الإصابات بالفترات اللي فاتت. ومع كده الأرقام بتتكلم:
- لعب مع ليفركوزن 100 ماتش
- كسب 67
- اتعادل 23
- خسر 10 بس
- وحقق لقب الدوري الألماني التاريخي
كل ده بيأكد إن اختيار كامينفورتي مش جاي من فراغ، وألونسو عايز يبتدي مشروعه في مدريد من تحت، من الأساس، من اللياقة البدنية والجاهزية العالية.
الملكي شكله راجع بقوة، ومش بس بالنجوم، لكن كمان بالعقول والكوادر اللي هتشيل الفريق من الداخل.
