أنشيلوتي مدربًا للبرازيل رسميًا وبيبدأ مشواره في يونيو ضد الإكوادور
أعلن الاتحاد البرازيلي لكرة القدم، من شويه، عن تعاقده الرسمي مع المدرب الإيطالي كارلو أنشيلوتي، عشان يقود منتخب البرازيل في كأس العالم 2026 اللي هيتلعب في أمريكا.
أنشيلوتي هيسيب ريال مدريد نهاية الموسم بعد فشل الفريق في التتويج بأي بطولة كبيرة، خصوصًا بعد الهزيمة اللي حصلت امبارح قدام برشلونة بنتيجة 4-3 في الدوري الإسباني، واللي تقريبا أنهت آمال الريال في اللقب.
ريال مدريد ناوي يعلن رسميًا عن رحيل أنشيلوتي في نهاية الأسبوع ده، بعد ما تأكد فقدان لقب الدوري الإسباني.
الاتحاد البرازيلي وضح إن أنشيلوتي هيبدأ مهمته مع السيلساو في شهر يونيو، وتحديدًا خلال التوقف الدولي، اللي هيشهد مباراتين مهمين لتصفيات أمريكا الجنوبية المؤهلة للمونديال.
أول ماتش رسمي لأنشيلوتي هيكون ضد الإكوادور يوم 6 يونيو، وبعدين هيستضيف منتخب باراجواي يوم 11 يونيو.
البرازيل دلوقتي في المركز الرابع بتصفيات المونديال بـ21 نقطة من 6 فوز و5 هزيمه و3 تعادلات، وبتأمل الجماهير إن المدرب الإيطالي يكون هو المنقذ ويعيد هيبة المنتخب.
