أحمد فهمي نجم “ابن النادي” وبيستعد لفيلم أكشن مع السقا
منصة شاهد أعلنت من شوية عن مسلسل جديد بعنوان “ابن النادي” من بطولة النجم أحمد فهمي، وتأليف مهاب طارق، وإخراج كريم سعد.
ونشرت المنصة صورة لفهمي ماسك سيناريو المسلسل، وكتبت: “أحمد فهمي والكورة، مسلسل أسطوري في انتظاركم”، واللي هيكون من إنتاجات شاهد الأصلية.
أحمد فهمي كمان بيستنى عرض فيلمه الجديد “أحمد وأحمد” اللي بيجمعه لأول مرة مع النجم أحمد السقا في بطولة مشتركة، وبيصنف من نوعية الأكشن الكوميدي.
السقا هيجسد دور خاله، ويدير إمبراطورية إجرامية، وبيتعرّض لحادث يفقد فيه الذاكرة، وفهمي بيجسد دور مهندس ديكور، وبتجمعهم مواقف مضحكة ومشاكل كتير.
الفيلم من تأليف أحمد درويش ومحمد عبد الله سامي، وإخراج أحمد نادر جلال.
وده مش أول تعاون بين السقا وفهمي، لكن أول مرة يشتغلوا سوا كبطولة، بعد ما ظهروا كضيوف شرف في أعمال قبل كده، زي “جولة أخيرة” و”عصابة الماكس”.
آخر أعمال أحمد فهمي في السينما كان فيلم “عصابة الماكس” اللي شارك فيه مجموعة نجوم وضيوف شرف كتير، منهم أحمد السقا، حمو بيكا، وصلاح عبد الله.
