مانشستر سيتي يكشف عن قميصه الجديد لموسم 2026 بلمسه تاريخيه
أعلن نادي مانشستر سيتي الإنجليزي النهارده التلات، عن الطقم الأساسي الجديد اللى هيلعب بيه في الموسم الجاي 2025-2026، وده بالتعاون مع شركه رياضيه عالميه متخصصه في الأدوات والملابس الرياضيه.
الطقم الجديد جاي بتصميم فيه لمسه تاريخيه واضحه، خصوصا مع وجود الوشاح الشهير اللى بيرمز لقمصان السيتي القديمه، وبيجي بشكل مائل على القميص بلونه الأبيض، مع الأزرق السماوي المعتاد اللى دايمًا بيرتبط بالسيتي.
الوشاح ده بيرجع تاريخه لسبعينات القرن اللي فات، لما كان بيرتديه أساطير النادي زي مايك سمربي، كولين بيل، فرانسيس لي وتوني بوك، واللى سابوا بصمه كبيره في تاريخ السيتي.
مانشستر سيتي احتفل بإطلاق القميص الجديد عن طريق فيلم قصير أخرجه جلين كيتسون، وشارك فيه النجم الكوميدي جون طومسون، ومعاه نجوم من الفريق زي إيرلينج هالاند، عمر مرموش، أوسكار بوب، أليكس جرينوود، ومانويل أكانجي.
الجماهير تفاعلت بشكل كبير مع التصميم الجديد، خصوصا إنه بيجمع بين الماضي العريق والستايل العصري، وده خلّى القميص الجديد حديث السوشيال ميديا من لحظة الإعلان عنه.
