باريس سان جيرمان يطالب مبابي بتعويض خرافي بعد انتقاله لريال مدريد
بدأت نار الخلافات بين باريس سان جيرمان ونجمه السابق كيليان مبابي تاخد شكل قانوني، بعد ما ساب النادي الفرنسي وانتقل لريال مدريد الصيف اللي فات ببلاش بعد نهاية عقده.
مبابي بيطالب باريس بـ55 مليون يورو باقي مستحقاته، لكن فجأه النادي رد عليه بدعوى قضائية عايز فيها 98 مليون يورو تعويض وده بعد ما اللجنة القانونية في رابطة الدوري الفرنسي ألزمت باريس بدفع الـ55 مليون لمبابي، لكن باريس رفض القرار وراح مستأنف في محكمة العدل.
رينو سيميرجيان، محامي النادي الباريسي، قال إن مبابي أضر بالنادي بسبب تصرفاته الغير عادله، وده سبب إنهم بيرفعوا عليه دعوى مضادة وأكد كمان إن الهدف مش الفلوس قد ما هو إثبات إن مبابي عليه دين للنادي وإن مطالبه مفيهاش صحة.
القضيه لسه ماشية في المحاكم، ومبابي سايب كل ده وعايش حياته في مدريد، بيستعد لموسم جديد لكن واضح إن باريس مش ناوي يسكت وهيكمل الحرب القانونية للنهايه.
النزاع ده ممكن يفتح باب جديد لخلافات قانونية بين اللعيبه والأندية في عقود الانتقالات، خصوصًا في الصفقات الحرة.
