مبابي يوجع باريس بالحجز عالحسابات والنادي بيرد بطلب رسمي
الامور مولعه بين باريس سان جيرمان ونجمه السابق كيليان مبابي، بعد ما حصل الاخير على حكم قضائي بيخليه يصادر 55 مليون يورو من حسابات النادي، اللي قال إن دي مستحقات متأخره ليه بعد ما رحل لريال مدريد الصيف اللي فات.
صحيفة لو باريزيان كشفت إن باريس سان جيرمان قدم طلب رسمي للمحكمه علشان يلغي الحجز على حساباته البنكيه، وقال إن مبابي مش من حقه ياخد الفلوس دي.
المشكله دي جزء من نزاع طويل بين الطرفين، بعد رحيل مبابي مجانًا عن الفريق، والنادي شايف إنه اتضر كتير من تصرفاته، لدرجة إنه طالب بتعويض 98 مليون يورو في قضيه تانيه.
الجماهير مش فاهمه ليه الدنيا وصلت لكدا، خصوصًا إن مبابي كان نجم الفريق الاول، والنادي فضل يحاول يقنعه يبقى لآخر لحظه، لكنه رفض.
في الوقت ده مبابي مركز مع ريال مدريد، بيستعد للنهائيات، وسايب المحامين يتصرفوا.
واضح إن القصة لسه طويله، وباريس ناوي يكمل للآخر، والكل مستني قرار المحكمه اللي هيحدد مصير الفلوس والنزاع.
