أسعار الدهب بترتفع من تاني في مصر النهارده.. شوف بكام الجرام
أسعار الدهب في مصر رجعت تاني للطلوع النهارده التلات 13 مايو 2025، بعد ما كانت نزلت بشكل كبير امبارح والناس اللي كانت مستنية تشتري وهي بتقول “يمكن ينزل أكتر”، اتفاجئت بالزياده الجديده في الأسعار، واللي جاية على طول من تأثير السوق العالمي اللي بردو حصل فيه ارتفاع.
أكتر عيار بيشتريه الناس في مصر، وهو عيار 21، سجل النهارده 4640 جنيه للبيع، و4590 جنيه للشراء، يعني فرق بسيط بس مؤثر، وده على حسب موقع «Gold-Era» اللي بيوضح الأسعار أول بأول.
ودول باقي الأسعار النهارده في السوق:
- عيار 24: بـ5303 جنيه للبيع – و5246 جنيه للشراء
- عيار 18: بـ3977 جنيه للبيع – و3934 جنيه للشراء
- الجنيه الدهب: بـ37552 جنيه للبيع – و36912 جنيه للشراء
الزياده دي جات بعد خسارة كانت تقيلة امبارح، وصلت لـ175 جنيه في الجرام الواحد! يعني السوق حالياً ماشي على الموجة، يوم فوق ويوم تحت، واللي بيفكر يشتري أو يبيع لازم يكون صاحي كويس ويتابع أول بأول.
وفيه سبب رئيسي للي حصل النهارده، وهو إن أسعار الذهب بره مصر كمان طلعت، فـ في المعاملات الفوريه العالمية، سعر الذهب زاد بنسبة 0.5% ووصل لـ3254 دولار للأونصة، وكمان العقود الآجلة في أمريكا طلعت 0.9% وسجلت 3257 دولار.
الناس بقت تلجأ للدهب كملاذ آمن بسبب التضخم اللي مكمل، وكمان التوترات السياسية حوالين العالم بتأثر على حركة السوق، سواء هنا أو بره.
يعني اللي ناوي يشتري دهب، لازم يتابع السوق كل يوم، لأن الأسعار بقت بتتغيّر بسرعه ومحدش ضامن هيعلى ولا هينزل.
