3 اكتشافات بترول وغاز جديده فـ مصر و”خالده” تتصدر المشهد
الأسبوع ده كان مليان أخبار حلوه في قطاع البترول، بعد ما أعلنت شركات خالده وبتروبل وجابكو عن 3 اكتشافات مهمه للزيت والغاز الطبيعي في الصحراء الغربية وخليج السويس، وده بيأكد إن مصر مازالت عندها كنوز تحت الأرض محتاجة تتكشف.
نبدأ بشركة خالده، واللي قدرت تحقق كشف جديد يوم 11 مايو في منطقة جنوب NUT-1 فـ الصحراء الغربية والبئر ده أثبت وجود غاز طبيعي في طبقة رمال الشفا بسمك صافي 253 قدم، وده معناه إن فيه احتياطي كبير متوقع يوصل لـ12.5 مليون برميل زيت مكافئ! (يعني حوالي 62.7 مليار قدم مكعب غاز و1.15 مليون برميل متكثفات).
والشركه دلوقتي شغاله على اختبار البئر وقياس الضغوط، وكمان شغالة على مد خط انتاج بطول 23 كم واستثمارات حوالي 10 مليون دولار، وده ضمن خطه أكبر لحفر آبار جديده تزيد الإنتاج أكتر. المتوقع إن البئر ده لوحده ينتج 30 مليون قدم مكعب غاز فـ اليوم!
نيجي لشركة بتروبل، واللي أعلنت يوم 8 مايو عن كشف مهم فـ خليج السويس بعد اختبار البئر غرب فيران-2، واللي تم تثقيب 27 متر في طبقة رمال عسل، وقدرت تنتج منه 2660 برميل زيت فـ اليوم، وبيتم حاليًا تقييم الاحتياطي الجديد اللي أضافه البئر.
كمان شركة جابكو كانت على الموعد، واكتشفت بئر جديد يوم 1 مايو، بعد اختبار البئر GS327-A15، اللي طلع منه 720 برميل زيت يوميًا من خلال تثقيب 38 قدم في رمال الكريم، ولسه التقييمات شغالة علشان يحددوا كمية الاحتياطي اللي ممكن يضاف.
اللي بيحصل ده مش مجرد أرقام، ده بيدل على إن وزارة البترول والثروة المعدنية ماشية بخطة واضحة لتعزيز الإنتاج وزيادة عمليات الحفر الاستكشافي، وده شيء مهم جدًا في ظل التحديات الاقتصادية والطلب المتزايد على الطاقة.
