آرسنال وليفربول يتصارعون على هويسين وريال مدريد داخل الخط
الانتقالات الصيفية قربت تولع، والكل عينه على المدافع الشاب دين هويسين نجم بورنموث، اللي فجأة بقى مطلوب من كبار أوروبا.
آرسنال وليفربول دخلوا في صراع كبير عليه، وكل واحد فيهم بيحاول يخطفه قبل التاني، وده حسب تقارير “سكاي سبورتس” النسخة الألمانية.
الموضوع مش واقف على الإنجليز بس، ده كمان ريال مدريد حاطط عينه عليه، وبيتابع الموقف عن قرب، لكن لسه ما دخل بشكل رسمي في الصفقة، وبيبص على توقيت القرار النهائي للاعب.
أما بايرن ميونخ، فشكله خرج من السباق السبب؟ الوقت ضيق والنادي لسه ما باعش لاعبين علشان يقدر يمول الصفقة، خصوصًا إنهم مركزين دلوقتي على التعاقد مع جوناثان تاه من ليفركوزن، اللي عقده خلص وبقى متاح ببلاش.
دين هويسين عنده شرط جزائي في عقده مع بورنموث بـ50 مليون جنيه إسترليني، وبيقولوا إنه ممكن يتدفع على 3 دفعات.
فهل آرسنال أو ليفربول هيحسموها؟ ولا ريال مدريد يدخل بقوة ويقلب الطاولة؟ الأيام الجاية هتوضح كل حاجة.
