هل نشوف ميسي في الدوري السعودي؟ فرق كتير دخلت الخط!
واضح إن ليونيل ميسي لسه ماخلصش كلامه مع الدوري السعودي!
البرغوث الأرجنتيني رجع تاني لدائرة الإهتمام، وبقى فيه كلام كتير حوالين مستقبله، خصوصًا لو قرر يسيب إنتر ميامي الأمريكي.
الهلال باين عليه ناوي يدخل بقوة، لأنه محتاج نجم عالمي يدعم طموحاته، سواء في دوري أبطال آسيا أو حتى كأس العالم للأندية ووجود ميسي في الزعيم؟ أكيد هيعمل فرق كبير.
لكن مش الهلال لوحده اللي عينه على ميسي، الأهلي كمان دخل عالسطر، وخصوصًا بعد ما حصد لقب آسيا، وعاوز يحافظ على مكانه في القمة وده يخليه يدور على نجم بحجم ميسي يرفع سقف الطموحات أكتر وأكتر.
النصر؟ برضو موجود، وفكرة جمع ميسي ورونالدو في فريق واحد هتكون ضربة إعلامية وتاريخية، ودي حاجه الجماهير بتحلم بيها من زمان.
بس المفاجأة الكبيرة هي اسم نادي نيوم! المشروع الجديد ده ممكن يبقى وجهة مستقبلية لميسي، وساعتها هيكون هو النجم الأول والأبرز في مشروع كروي ضخم ولسه في بدايته.
فهل ممكن فعلًا نشوف ميسي في الدوري السعودي؟ ولا الكلام كله مجرد شائعات؟ الأيام الجاية هتوضح كل حاجه.
