النصر ناوي يودّع بروزوفيتش ويغيّر خط الوسط بالكامل
يبدو إن أيام النجم الكرواتي مارسيلو بروزوفيتش مع النصر قربت تخلص، خصوصًا بعد الأخبار اللي طلعت عن نية إدارة العالمي في الإستغناء عنه نهاية الموسم.
بروزوفيتش، اللي كان لاعب مهم في خط وسط النصر، شكله مش داخل في خطط النادي للموسم الجاي، والسبب الأساسي إن الإدارة ناوية تجدد الدماء وتجيب لاعب أصغر في السن ويكون عنده حيويه أكتر في نص الملعب.
الكرواتي هيكمل 33 سنة الموسم الجاي، والنصر حابب يجيب لاعب وسط عنده قدرات بدنية ودفاعية أقوى، يساعد الفريق في البطولات المحلية والأسيوية، خصوصًا إن الفريق داخل على تحديات كبيرة وبيبص للألقاب مش بس المشاركات.
رغم إن أداء بروزوفيتش ماكانش سيء، شارك في حوالي 70 مباراة وسجل 6 أهداف وصنع 15 هدف، لكن إدارة النصر شايفه إن المركز ده محتاج لاعب بمواصفات مختلفة.
كل ده بيأكد إن النصر ناوي على شغل كبير في الصيف، وملف خط الوسط هيكون أول الحاجات اللي هيتغير فيها، فهل هنشوف صفقة قوية تعوّض رحيل بروزوفيتش؟ خلينا نشوف!
