تحديات بالجمله قدام تشابي ألونسو لو مسك تدريب ريال مدريد
واضح إن تشابي ألونسو لو استلم تدريب ريال مدريد في الموسم الجاي، مش هيدخل على فرقة جاهزه ومكمله، بالعكس قدامه شوية تحديات كبيره ولازم يتحرّك صح.
حسب صحيفة “آس” الإسبانية، الإدارة في مدريد، سواء فلورنتينو بيريز أو خوسيه أنخيل سانشيز، عارفين كويس إن الفريق محتاج تدعيمات في كذا مركز، بعد ما الموسم الحالي كشف نواقص كتير في التشكيله.
أول حاجه محتاجين ظهير أيمن، وبيفكروا في ترينت ألكسندر أرنولد، نجم ليفربول، واللي ممكن يضيف كتير للجهة اليمنى، بس أكيد الصفقة مش هتكون سهله.
كمان في مدافع مركزي على الرادار، واسمه هويسن، والنادي معجب بإمكانياته، بس تكلفته العاليه ممكن تكون عائق، خصوصًا مع الميزانيه اللي مش هتكون مفتوحه على الآخر.
في خط النص، زوبيميندي كان خيار ممتاز، لكن تقريبًا رايح لأرسنال، وده خلى الريال يفكّر في بدائل تانيه بسرعه، لأن المركز ده محتاج لاعب قوي فعلاً.
وبالنسبه للظهير الأيسر، ألفونسو ديفيز كان على رأس القائمه، بس فجأه جدّد مع بايرن، وده خلى الخطه تتلخبط شويه، فمحتاجين حل بديل.
وفي الهجوم، فيه تفكير يجيبوا مهاجم صريح على طراز خوسيلو، يكون موجود وقت اللزمه خصوصًا في الماتشات اللي الكرات العرضيه فيها هي الحل الوحيد.
اللي واضح إن تشابي ألونسو لو جه، مش بس هيحتاج يثبت نفسه كمدرب، لأ كمان لازم يشتغل مع الإدارة على ترميم الفريق صح، علشان يقدر ينافس على كل البطولات.
