قواعد اللبس بالمهرجانات السينمائيه بتحير الناس وبتقسم الآراء حوالينها
المهرجانات السينمائيه بقت مش بس عرض افلام، دي كمان منصه للموضه، وبتتحول السجاده الحمرا لعرض أزياء رسمي عشان كده، إدارات المهرجانات بتحط قواعد للبس بتسمى دريس كود، واللي بتحدد إيه اللي ممكن يتلبس وإيه لأ.
يعني مثلًا، لو الحفله بالليل زي الافتتاح أو الختام، لازم لبس Black Tie، يعني البدله السموكنج للرجاله وفستان سواريه طويل للستات ولو الحفله مودرن أكتر، ممكن Creative Black Tie، يعني فيه شويه حريه في التصميم بس لازم يفضل شكله رسمي.
العروض النهاريه أو المؤتمرات الصحفيه بيكون اللبس فيها Formal أو Semi-Formal، يعني بدله عاديه أو قميص شيك، والستات يلبسوا حاجه أنيقه ومناسبه.
بس مؤخرًا، المهرجانات بقت تشدد أكتر على اللبس، زي منع الفساتين الشفافه أو العاريه، أو اللبس الرياضي، وده حصل في مهرجان كان 2025، وكمان مهرجان القاهره بقى يمنع اللبس الغير لائق.
مع إن الناس بتختلف، في اللي شايف إن ده بيكبت الحريه، وفي اللي شايف إن ضروري نحافظ على شكل المهرجان قدام العالم، كل مهرجان وليه طابع ثقافي بيأثر على قراراته.
