فينغر يشيد ببيدري ويعتبره سر نجاح برشلونة الحقيقي مش لامين
في الوقت اللي كل العيون على لامين جمال بسبب مستواه الرائع مع برشلونة الموسم ده، خرج المدرب الأسطوري آرسين فينغر بتصريح مختلف خالص، وقال إن بيدري هو المفتاح الحقيقي لنجاح الفريق، مش لامين زي ما الكل بيقول.
فينغر اتكلم مع شبكة “بي إن سبورتس” وقال: “الكل بيتكلم عن لامين، بس أنا شايف إن بيدري هو اللي يستحق تسليط الضوء. بالنسبالي، بيدري لاعب مذهل، أركع احترامًا ليه.”
كلام كبير من مدرب كبير، واللي بيأكد إن تأثير بيدري في نص الملعب أكبر من مجرد أرقام أو أهداف.
فينغر كمان وضّح إن بيدري عنده نضج ذهني وتكتيكي مش طبيعي بالنسبه لسنه، وقال: “علم خط الوسط موجود في قدمي وعقل بيدري ,أسلوبه بيخلي برشلونة مختلف عن أي فريق تاني.”
رغم إن بيدري عنده بس 22 سنة، لكنه دلوقتي واحد من المرشحين بقوة للكرة الذهبية، وده مش بس علشان موهبته، لكن كمان علشان الموسم الرائع اللي بيقدمه تحت قيادة فليك.
بيدري أخيرًا قدر يحافظ على لياقته بعد سنين تعب من الإصابات، وشارك في أغلب مباريات الموسم، وده خلى فليك يعتمد عليه بشكل أساسي وكمان برشلونة بيعتبره قطعة أساسية في المشروع الجديد، خصوصًا بعد تمديد عقده مؤخرًا.
الجمهور شايف لامين بيخطف الأضواء، بس فينغر شايف الصورة الأعمق، واللي فيها بيدري هو اللي ماسك مفاتيح اللعب ومخلّي الفريق واقف على رجله.
