تحديث iOS 18.4 أخيرًا لمستخدمين أوروبا.. بس في ميزة مهمة مش هتوصل!
في خطوة جديدة من شركة أبل، أعلن الاتحاد الأوروبي على صفحاته الرسمية عن قرار مهم بخصوص تحديث iOS 18.4، واللي ناس كتير في أوروبا والعالم كله مستنيينه بفارغ الصبر , ومن قبل ما ندخل في تفاصيل التحديث، لازم ننوّه إن واحدة من أقوى مميزات الآيفون وهي ميزة انعكاس الشاشة (iPhone Mirroring) بقت من الحاجات اللي مستخدمي أبل بيعتمدوا عليها بشكل كبير، لأنها بتخليهم يقدروا يشوفوا شاشة موبايلهم على اللابتوب ويتحكموا فيه بالكامل عن بعد، سواء بيردوا على رسايل، أو بيتصفحوا التطبيقات، أو حتى بيلعبوا ألعابهم المفضلة.
إيه الجديد في تحديث iOS 18.4؟
شركة أبل صرّحت بشكل رسمي إن التحديث الجديد iOS 18.4 هيكون متاح لمستخدمين الاتحاد الأوروبي، وهيشمل أخيرًا مميزات الذكاء الاصطناعي AI اللي الناس في باقي دول العالم بتستخدمها من فترة.
المميزات دي بتشمل حاجات زي:
- مساعد ذكي مطوّر أكتر.
- تحسين في الفويس كومنادز.
- اقتراحات ذكية داخل التطبيقات.
- وإدوات بتسهل الاستخدام اليومي بشكل كبير.
بس بالرغم من الفرحة الكبيرة اللي جاية مع التحديث، فيه حاجة مهمة مش هتوصل لأوروبا وهي ميزة انعكاس الشاشة للماك.
ليه ميزة الانعكاس مش هتوصل لأوروبا؟
أبل وضحت إن السبب الأساسي إن الخاصية دي ممكن تشكل خطر على خصوصية المستخدم، وإنها مش متوافقة مع معايير الأمان العالية اللي الشركة بتلتزم بيها.
وقالت كمان إن تطبيق الميزة دي داخل دول الاتحاد الأوروبي ممكن يفتح باب لاختراقات محتملة، وده طبعًا بيرفع مستوى المخاطرة على بيانات المستخدمين.
إمتى ينزل تحديث iOS 18.4؟
واحدة من أكتر الأسئلة اللي بتتسأل دلوقتي: هو التحديث هينزل إمتى؟
الإجابة حسب التصريحات الرسمية إن التحديث هيبدأ يتوفر بشكل رسمي خلال شهر إبريل الحالي 2025، وهيكون متاح للتحميل لكل مستخدمي أبل، وخصوصًا في أوروبا بعد طول انتظار.
يعني لو كنت في أوروبا، جهز موبايلك واستعد للمميزات الجديدة اللي جايه مع iOS 18.4، بس متستناش ميزة الميرورينج دلوقتي.
وممكن دايمًا تتابع موقع أبل أو إعدادات الجهاز علشان أول ما التحديث يتوفر، توصلك إشعار فورًا.
