علامات تقولك إن واتسابك ممكن يكون مخترق وازاي تحمي نفسك
في الزمن اللي بقينا فيه كل يوم على تواصل دايم من خلال تطبيقات المراسلة، بقى واتساب واحد من أكتر التطبيقات استخدام وانتشار في العالم بس مع الشهرة دي، بقى كمان هدف واضح للناس اللي بتحاول تخترق الحسابات أو تراقب المحادثات , ورغم إن التطبيق بيستخدم تشفير عالي بيخلي الرسائل بينك وبين الطرف التاني بس، إلا إن في بعض الطرق الملتوية اللي ممكن يخترقوك بيها من غير ما تحس.
لو لاحظت الحاجات دي، خد بالك فورًا
في شوية حاجات كده لو ظهرت عندك، لازم توقف وتفكر، لأن ممكن يكون حد بيراقب حسابك أو داخله وانت مش واخد بالك:
- بطء في التطبيق أو تأخير في وصول الرسائل
- سخونة الموبايل من غير سبب
- البطارية بتخلص بسرعة رغم إنك مش بتستخدمه كتير
- تلاقي رسائل مقروءة وانت ما فتحتهاش
- خروج مفاجئ من حسابك على جهاز تاني
كل دي علامات بتقولك إن في حاجة مش طبيعية بتحصل ورا الكواليس.
خطوات تحمي بيها حسابك على واتساب من التلصص
لو عايز تأمّن نفسك وتطمن إن حسابك سليم، اتبع الخطوات دي:
- فعّل ميزة التحقق بخطوتين: روح على الإعدادات > الحساب > التحقق بخطوتين، وفعلها بكود سري، كده بتصعب الموضوع على أي حد يحاول يدخل حسابك.
- راجع الأجهزة المرتبطة: من إعدادات واتساب، ادخل على “الأجهزة المرتبطة”، ولو لقيت جهاز مش بتاعك، اعمله حذف فورًا.
- حدّث التطبيق باستمرار: التحديثات مش بس عشان شكل جديد، دي كمان بتحميك من ثغرات كتير.
- اوعى تفتح أي رابط مش مفهوم أو جالك من رقم غريب: دي أكتر طريقة بيستخدموها الهاكرز عشان يوصلوا لحسابك.
الاختراق مش بيحصل بس من تقنيات، ساعات بيحصل من قلة وعي , فخليك دايمًا واخد بالك من كل حاجة بتحصل في تليفونك، ولو شكيت في حاجة، اسأل أو افصل النت مؤقتًا لحد ما تتأكد.
