تشكيل ريال مدريد امام ارسنال الليله.. الريمونتادا ولا الخروج؟
ريال مدريد داخل النهارده على ماتش نار، ولازم يعمل معجزه لو عايز يكمل في الشامبيونز ليج وهيقابل آرسنال على ملعب “سانتياجو برنابيو” في مدريد، في ماتش إياب ربع نهائي دوري أبطال أوروبا موسم 2024-2025 وبعد الهزيمه الكبيره 3-0 في الذهاب على ملعب “الإمارات”، الوضع بقى صعب أوي، بس الميرينجي دايمًا عنده مفاجآت.
الجمهور مستني حاجه من نوع الريمونتادا اللي بنشوفها في الأفلام، خصوصًا إن الخسران هيروح، والكسبان هيقابل باريس سان جيرمان في نصف النهائي، حسب القرعه اللي اتعملت من كذا شهر.
ريال مدريد وصل لربع النهائي بعد ما طلع أتلتيكو مدريد في ديربي مولع، بينما آرسنال كان سابق آيندهوفن الهولندي وخلصها بدري وبس الماتش دا غير، دا مصيري، مفيش مجال للغلط ولا الحسابات.
تشكيل ريال مدريد
الصحافه بتقول إن أنشيلوتي ناوي يبدأ بالتشكيل ده:
- حراسة المرمي: تيبو كورتوا
- الدفاع: فران جارسيا، روديجر، راوؤل أسينسيو، فاسكيز
- الوسط: تشواميني، فالفيردي، بيلينجهام
- الهجوم: فينيسيوس، مبابي، رودريجو
آرسنال جاي واثق بعد ماتش الذهاب، بس الريال لو بدأ الماتش بدري وجاب جون في أول ربع ساعه، كل حاجه ممكن تتقلب ومش أول مره يرجع من هزيمه كبيره، بس المره دي لازم يكون عنده قلب أسد.
لو الريال ملعبش برجوله وبعقل، احتمال يخرج ويودع البطوله وبس الجمهور مستني معجزه كالعاده، ومين عارف؟ يمكن اللليله تكون من الليالي المجنونه اللي بيرجع فيها ريال مدريد من الموت.
