كورتوا ينتقد تكتيك ريال مدريد قدام آرسنال ويشكي من الكرات العرضيه
في تصريح فاجأ كثير من جماهير ريال مدريد، طلع الحارس البلجيكي تيبو كورتوا وتكلم بصراحه عن طريقة لعب فريقه في المباراه الأخيره ضد آرسنال بدوري أبطال أوروبا، واللي انتهت بتعادل سلبي مخيب، وقال إن الفريق إعتمد بشكل كبير على الكرات العرضيه بدون ما يكون فيه خطوره فعليه.
كورتوا قال بالحرف: “رسلنا وايد كرات عرضيه، بس لازم نخلق فرص أكثر من لعب جماعي وتحركات منسقه، لأن آرسنال عندهم مدافعين طوال، وإحنا ما عندنا لاعب مثل خوسيلو يفيد بهالنوع من اللعب”.
واضح من كلام كورتوا إنه مو عاجبه الخطه الهجوميه، واللي تعتمد على تكرار الكرات العرضيه بدون فايده، واللي ما نفعوا مع دفاع آرسنال القوي.
وشفنا فعلاً إن الفريق كان يعاني يفتح دفاع الخصم، وما قدر يسجل ولا هدف.
البعض فهم تصريحاته كنوع من الانتقاد الغير مباشر للمدرب الإيطالي كارلو أنشيلوتي، وقالوا إن فيه تلميح إنه لازم يصير فيه تنويع أكثر بالأسلوب، مو بس إرسال كرات عالطاير داخل المنطقه.
الجمهور انقسم، ناس شافوا إن كورتوا قال اللي كثير يفكرون فيه، وناس قالوا إن هالكلام ما يصير يطلع من لاعب عن زملاءه ومدربه بهالطريقه.
على العموم، الكلام هذا ممكن يفتح باب نقاش كبير داخل النادي عن كيفيه تطوير أداء الهجوم قبل مباريات الإياب الحاسمه.
