الحكومه بتراجع موازنه 2023 وبتحط خطه جديده للسنه الجايه
في اجتماع مجلس الوزراء النهارده اللي كان برئاسة الدكتور مصطفى مدبولي، ناقشوا شوية ملفات مهمه، وعلى رأسها اللي حصل في جلسات مجلس النواب بخصوص الحساب الختامي لموازنة الدوله 2023/2024 وكمان ملامح الموازنه الجديده للسنه الماليه 2025/2026.
أحمد كجوك، وزير الماليه، شرح ملاحظات النواب اللي اتكلموا فيها عن ضرورة تخفيض الديون وإعادة ترتيب الهيئات الاقتصاديه.
وقال إن الحكومه فعلاً عندها خطه واضحه للموضوع ده وتم عرضها على الرئيس عبد الفتاح السيسي، وهتبدأ تنفذها قريب.
وبالنسبه للهيئات الاقتصاديه، الوزير قال إن في لجنه شغاله على موضوع إعادة الهيكله، وبعض الهيئات هتتدمج أو يتم إلغاءها ورئيس الوزرا كمان قعد معاهم كذا مره لمتابعة التنفيذ.
رانيا المشاط، وزيرة التخطيط، اتكلمت عن خطة التنمية الاقتصاديه للسنه الجايه، وشرحت المستهدفات اللي الحكومة ناويه تشتغل عليها، سواء في القطاعات المختلفه أو في البرامج التنمويه اللي هتتطبق.
كمان وزير العمل محمد جبران شكر البرلمان على إصدار قانون العمل الجديد، وقال إنه قانون متوازن بيخدم العمال وأصحاب الشغل في نفس الوقت، وهيفتح فرص استثمار جديده.
ومن ناحيته، قال علاء فاروق وزير الزراعه إن الحكومه ملتزمه تدفع مستحقات مزارعين القطن وبتتابع ده مع الوزارات المعنيه.
وفي الآخر، مدبولي شكر البرلمان وقال إن الحكومه ناويه تنفذ توصيات النواب علشان مصلحة البلد.
