ركاب اتمنعو من السفر في مطار سفنكس بسبب نوع التأشيره
في بيان طلع من الشركه المصريه للمطارات ونزلته على صفحتها الرسميه على فيسبوك، وضحت فيه اللي حصل بخصوص مشكله في مطار سفنكس الدولي، بعد ما انتشر كلام كتير على السوشيال ميديا عن منع ركاب من السفر للسعوديه.
البيان قال إن السلطات السعوديه طلعت قرارات جديده بخصوص موسم الحج 1446هـ / 2025، منها إنها وقفت إصدار تأشيرات الترانزيت وكمان التأشيرات القصيره زي العمل والسياحه والزياره العائليه، لكن استثنت التأشيرات الدبلوماسيه والخاصة.
وعشان كده، اتوقف سفر أي حد معاه تأشيرات من النوع ده من كل مطارات مصر مش بس مطار سفنكس. واللي حصل في الرحله رقم (XY588) تبع شركة فلاي ناس المتجهه لمطار جده، إن تم السماح لـ 38 راكب بس بالسفر لإن تأشيراتهم سليمه، لكن اتمنع 130 راكب عشان تأشيراتهم مش متوافقه مع القرارات الجديده، فركاب كتير اتضايقو واشتكو على شركة الطيران.
سلطة الطيران المدني بتتابع الوضع مع السعوديه وبتراجع اللي حصل، وادارة مطار سفنكس قالت إن حركه الطيران مستمره بشكل طبيعي.
وناشدت الناس اللي مسافرين السعوديه يتأكدو من نوع التأشيره قبل ما يروحو المطار ويتابعو بيانات شركات الطيران الرسميه أو يسألو مكاتب الحجز المعتمده عشان ميبقاش فيه مفاجأت في السفر.
