الحكومه توافق على زياده منح العماله الغير منتظمه لـ 1500 جنيه
في اجتماعه النهارده، وافق مجلس الوزراء على زياده قيمه المنح الدوريه اللي بتتصرف للعماله الغير منتظمه، وده عن طريق تمويل من وزارة الماليه لصالح وزارة العمل، علشان توصل قيمة المنحه لـ1500 جنيه لكل مره، ويتصرف منهم 6 منح في السنه لكل مستحق.
الزياده دي جت ضمن حزمة الحمايه الإجتماعيه اللي وافق عليها السيد رئيس الجمهوريه، واللي تم الإعلان عنها في مؤتمر صحفي حضره السيد رئيس مجلس الوزراء بعد اجتماع الحكومه اللي كان بتاريخ 26 فبراير 2025.
القرار ده بيهدف إنه يخفف العبء عن كاهل العماله اللي مش مرتبطه بعمل دائم، واللي بيشتغلوا في شغلانات يوميه أو موسميه، وبيكونوا في حاجه مستمره لدعم ومسانده من الدوله، خصوصًا في الظروف الإقتصاديه اللي بتمر بيها البلد والعالم كله.
وزارة العمل هتبدأ في تنفيذ القرار ده على الفور بعد ما يتم الإنتهاء من إجراءات الصرف، وهيتم الصرف للناس اللي مسجله في قواعد بيانات الوزارة فقط، علشان يكون في تنظيم وضمان لوصول الدعم للمستحقين الفعليين.
القرار ده اعتبره ناس كتير خطوه مهمه لدعم الفئات اللى كانت مهمشه زمان، واللي ماكانش ليهم سند غير شغلهم، وبيأكد إن الدوله مهتمه بكل فئات المجتمع، مش بس الموظفين أو أصحاب المعاشات.
ناس كتير أبدت ارتياحها من الخطوه دي، وبتطالب بسرعة تنفيذها من غير تأخير.
