بينيتو ينتقد أداء ريال مدريد ويشدد على غياب الروح الجماعيه
وجه ألفارو بينيتو، لاعب ريال مدريد السابق، انتقادات واضحه لأداء الريال الموسم ده، وقال ان السبب الرئيسي في التراجع هو غياب العمل الجماعي اللي كان دايمًا سر قوه الفريق.
بينيتو قال: “الفريق باين عليه العجز في كذا نقطه، ولما مفيش شغل جماعي حقيقي، اللاعيبه بيبانوا أسوأ بكتير من مستواهم الحقيقي، حتى لو هما لعيبه كبار وموهوبين في لاعبين كويسين جدًا في ريال مدريد، بس شكلهم مش بيبين كده، وده بسبب إن الفريق مش شغال ككتله وحده”.
وأكد ان النجاح الفردي بييجي من خلال المنظومه الجماعيه، وإن أي خلل فيها بيأثر على الكل، مش لاعب واحد بس.
ولما اتسأل عن ايه اللي محتاجه الريال علشان يرجع تاني على الطريق الصح، قال بكل صراحه: “النادي محتاج تدريب يكون أحسن، أكتر فاعليه وتنظيم، لازم الفريق يشتغل كفريق فعلاً، مش مجموعه أفراد بس بيلعبوا سوا، لأن حتى التفاصيل الصغيره وقعنا فيها الموسم ده، وغلطنا في تنظيمات كتيره كانت واضحه”.
وأضاف: “الفكره كانت إن مجرد وجود لاعيبه كبار في الفريق كفايه، بس ده كان وهم، الواقع طلع أصعب بكتير، والنتايج أثبتت كده”.
تصريحات بينيتو بتفتح باب نقاش كبير حوالين مستقبل الفريق والتغييرات اللي محتاج يعملها قبل الموسم الجاي، سواء فنياً أو ذهنياً.
