أنشيلوتي تحت الضغط بعد خسارة آرسنال وروما بيترقب قرار ريال مدريد
كارلو أنشيلوتي، مدرب ريال مدريد، بيمر حاليًا بمرحله صعبه جدًا يمكن تكون الأصعب من وقت ما رجع يدرب الفريق، خصوصًا بعد الخساره التقيله قدام آرسنال اللي فجرت تساؤلات كتير حوالين مستقبله مع الملكي.
الصحف في إيطاليا بدأت تتكلم عن اهتمام نادي روما بالتعاقد مع أنشيلوتي، بس ده طبعًا لو إدارة ريال مدريد قررت تفسخ عقده اللي ممتد معاه لحد سنة 2026.
النادي الإيطالي مستني يشوف إيه اللي هايحصل في مدريد، ومش ناوي يدفع أي مقابل لو أنشيلوتي متاح بالمجان.
الوضع حاليًا غامض جدًا، ومحدش عارف القرار النهائي هيكون إيه. أنشيلوتي لسه محافظ على احترام كبير جوه النادي وبين اللاعبين، بس الأداء والنتايج بقت مش مُرضية خالص للجماهير ولا للإدارة.
لو الريال قرر يكمل معاه، يبقى أكيد روما هيصرف نظر، عشانهم عارفين صعوبة التعاقد مع مدرب بالحجم ده وهو لسه شغال مع نادي كبير زي مدريد.
إنما لو تم الاستغناء عنه، ساعتها ممكن نشوف أنشيلوتي في الكالشيو من تاني.
القرار في الآخر في إيد فلورنتينو بيريز، وكل العيون دلوقتي على الأسابيع الجاية اللي ممكن تحدد مصير أنشيلوتي رسميًا، وهل هيفضل في البرنابيو ولا هيبدأ رحلة جديده في روما.
