هانز فليك ينفجر غضب بسبب ضغط المباريات بعد دورتموند
المدرب الألماني هانز فليك، المدير الفني لفريق برشلونه، انفجر غضب بعد ما انتقد رابطة الدوري الإسباني، بسبب جدول المباريات المزدحم واللي بيأثر على فريقه، خصوصًا بعد المشاركه في دوري الأبطال.
فليك قال في تصريحات إعلاميه قبل مواجهة سيلتا فيجو، اللي هتتلعب السبت، إنه مش راضي عن اللي بيحصل، خصوصًا إن الفريق لعب يوم التلات ضد دورتموند، ولسه راجعين من رحله سفر طويله، وقال: “ننام متأخر ونصحى بدري، ومافيش وقت نرتاح فيه”.
وأضاف المدرب: “إحنا وصلنا لنصف نهائي دوري الأبطال، ونهائي الكأس، ولسه متصدرين الدوري.
لو حد قاللي في بداية الموسم إننا هنكون كده، كنت قلتله تعال أحضنك!”.
فليك وضّح إن اللاعبين بيشتغلوا بكل قوتهم، وإنه شايف مجهودهم في كل تدريب، وهما يستحقوا الدعم مش الضغط ده.
وأكد إنه عايز يتكلم مع المسؤولين عن اللي بيحصل، لأن في الدوريات التانيه بيدوا الفرق المشاركه في أوروبا راحه، إنما هنا مافيش تقدير.
واختتم كلامه وقال: “إحنا لسه في المنافسه، وماخسرنا غير ماتش واحد، ولسه قدامنا طريق طويل”.
