إيهاب فهمي: قرار محمد سامي صدمني وكنت أول حد دعمه
كشف الفنان إيهاب فهمي إن إعلان المخرج محمد سامي اعتزال الإخراج التليفزيوني كان مفاجأة كبيره ليه، وعلشان كده كان من أول الناس اللي دعموه بعد القرار ده، سواء على المستوى الإنساني أو الفني.
وفي حواره مع الإعلاميه ياسمين عز في برنامج “كلام الناس” على قناة MBC مصر، قال إيهاب: “أنا معرفتش أستوعب إن محمد سامي مش هيخرج تاني، لأن وجوده مكسب، ولو مش موجود تبقى خسارة كبيره”.
وأضاف: “هو مش بس مخرج شاطر، هو إنسان جميل وروحه حلوة في اللوكيشن، ومش دايمًا بييجي فنان وإنسان بنفس المستوى ده”.
ويعتبر محمد سامي من أنجح المخرجين في الدراما، وكان أخرج مسلسلات كتير ناجحه، لكنه أعلن مؤخرًا إنه قرر يودع الدراما التليفزيونية بعد حوالي 15 سنة شغل متواصل، وكتب في بيان: “وداعًا الدراما، السنة دي آخر مسلسل أعمله”.
يُذكر إن إيهاب فهمي شارك في مسلسل “إش إش” اللي اتعرض في رمضان اللي فات، وكتب وأخرج العمل محمد سامي، وكانت بطولته مي عمر، ماجد المصري، شيماء سيف، وعدد كبير من النجوم وضيوف الشرف.
