حسام حبيب يعلن عن البومه الجديد على جزئين ويشارك في فيلم
أعلن المطرب حسام حبيب في لايف مباشر على تيك توك عن تفاصيل ألبومه الجديد، وقال إنه هيكون على جزئين، وكل جزء فيه ٥ أغاني، والجزء الاول هينزل قريب، والتاني في الصيف الجاي.
حسام وضح إن الألبوم من إنتاجه هو شخصيا بالتعاون مع شركه إنتاج كبيره، وهيعلن عن تفاصيلها قريب.
وقال كمان إن الأغاني نازله من قلبه، وكلها تعبر عن مشاعره الحقيقيه، خصوصا الجزء الأول اللي كله أغاني دراميه.
ووضح إن الألبوم مش تجاري لكنه بيعبر عن فترتين في حياته، واحده كانت صعبه مر بيها، والتانيه بدايه لحياة جديده بيحاول يعبر عنها من خلال الأغاني.
ومن ناحية تانيه، عبّر حسام عن فرحته بالتعاقد على تقديم ألحان وأغاني فيلم “السلم والتعبان ٢” وقال إن الفيلم هيكون حاجه مختلفه وهيغير شكل الرومانسي في السينما، تحت إشراف طارق العريان، ويمكن يكتفي بتقديم أغنيه واحده فيه.
وتكلم كمان عن أغنية “كدابه” وقال إنه مكنش حاببها في الأول علشان بيحبش يقدّم أغاني ضد الستات، بس بعد كده حبيها ونزلها.
وأكد دعمه للمواهب الشابه في الغنا والمزيكا علشان يظهروا على الساحه.
