كمال ابو ريه يطالب بدعم علي البيلي زي ما عملو مع توم كروز
طالب الفنان كمال ابو ريه إن الجهات المسؤوله تهتم بالطفل علي البيلي، اللي خطف الانظار في رمضان اللي فات بدور “يوسف” في مسلسل “لام شمسية”، وقال انه متوقع له مستقبل كبير جدًا، وده خلال لقائه مع الاعلاميه إنجي علي في برنامج “أسرار النجوم” على نجوم اف ام.
ابو ريه قال إنه كان بيراقب علي وهو بيعمل بروفات وكان هايل، وانه في مشهد معين علي قاله “يا اونكل ممكن تشخط فيا عشان اتأثر”، بس ابو ريه نصحه وقاله “عيش لحظتك ومتستناش اللي قدامك”.
وكشف كمان إن القاضي مش بيشخط في طفل، وان اللي علي طلبه مش واقعي، وقاله يروح ياخد رأي المخرج.
واضاف إن بلد زي امريكا طلعت توم كروز رمز، واهتمت بيه وهو صغير، وقال كمان “توم كروز ممثل ضعيف بس ستايله حلو وشكله قمر، وكسبوا من وراه كتير”.
مسلسل “لام شمسية” من تأليف مريم نعوم واخراج كريم الشناوي، وبطولة امينه خليل، احمد السعدني، يسرا اللوزي، علي البيلي، وغيرهم، وبيتناول قضايا زي علاقة الازواج والاعتداء على الاطفال.
