ألدو سيرينا يحذر برشلونه من سرعه تورام قبل مواجهه الانتر
النجم الايطالي السابق، الدو سيرينا، اللي سبق ولعب مع الانتر ويوفنتوس، طلع بتصريحات مهمه قبل لقاء برشلونه وانتر ميلان في نص نهائي دوري أبطال أوروبا، وقال فيها إن برشلونه لازم ياخد باله كويس، لان الانتر عنده فرصه حقيقيه يطلع بنتيجه كبيره.
سيرينا قال: “الانتر قدامه فرصه يحقق الفوز على برشلونه، الفريق منظم وبيعرف يستغل الفراغات، وده اللي شوفته لما كنت بحلل ماتش برشلونه وبوروسيا دورتموند، البرسا كان بيدافع بخط عالي جدا، وبيضغط كتير، بس ده بيخلي فيه مساحات كبيره ورا”.
وأشار كمان إلى إن الدفاع بتاع برشلونه مش دايمآ ثابت، وقال: “برشلونه بيسبب مشاكل لأي فريق في الضغط، بس في نفس الوقت، بيسيب مساحات خطيره في مناطق حساسه، ودي لو استغلها مهاجمين الانتر هتكون مشكله كبيره”.
وفي اخر كلامه، أثنى على مهاجم انتر ماركوس تورام، وقال إنه لاعب بيتطور بسرعه، وده الموسم ده واضح جدًا، وسرعته ممكن تكون سلاح قوي جدًا ضد برشلونه.
المباراه دي بتعتبر واحده من اهم المواجهات في الموسم، والجمهور مستني يشوف هل دفاع برشلونه هيقدر يقف قدام سرعه وقوه مهاجمين الانتر، ولا فعلاً تحذير سيرينا هيكون في محله؟
كل العيون دلوقتي على المواجهه المنتظره، واللي شكلها هتكون ناريه بكل المقاييس.
