كونتي ناوي يسيب نابولي مشاكل كتير خلت الوضع مايتحملش خلاص
في اخبار نازله اليوم عن مدرب نابولي انطونيو كونتي، واللي واضح إنه مش ناوي يكمل كتير مع الفريق، وقالت تقارير من موقع كالتشيو ميركاتو الإيطالي ان الراجل حاسس إنه وجوده في نابولي مابقاش ليه لازمه بعد اللي شافه من مشاكل مالهاش حل من وجهة نظره.
كونتي حسب الكلام اللي طالع، اتكلم قبل ماتش مونزا وقال كلام غريب، بيأكد فيه إنه فكر بجد يسيب النادي، وقال بالحرف: “بعد تمان شهور، فهمت إن في حاجات كتير ماينفعش تتعمل هنا”، ودا يوضح إن الامور وصلت معاه لطريق مسدود خلاص.
الوضع دا جاي في وقت الفريق فيه بيقدم مستويات كويسه وبيحاول ينافس على الدوري الإيطالي مع إنتر ميلان، يعني مش وقته خالص الكلام دا، خصوصًا إن الفريق دلوقتي في المركز التاني ومعاه 68 نقطه، وورا إنتر المتصدرين بفارق تلات نقط بس.
الموضوع دا عمل لغط كبير عند الجماهير اللي بدأت تقلق على مستقبل الفريق، خصوصًا لو فعلاً كونتي مشي، ساعتها نابولي ممكن يدخل في دوامه جديده ويدفع تمن الاستقرار اللي لسه مابانش حتى دلوقتي.
كونتي مدرب معروف بحزمه وشخصيته القويه، بس واضح إن الجو العام في النادي مابقاش مساعده خالص، ودا اللي خلى فكر يلم هدومه ويمشي قبل نهاية الموسم حتى.
