إصابة ليفاندوفسكي صداع لفليك قبل نهائي الكأس ضد ريال مدريد
في خبر مزعج جدا لكل عشاق برشلونه، المهاجم البولندي ليفاندوفسكي اتعرض لإصابه عضليه خلال ماتش سيلتا فيغو اللي كان في الجوله 32 من الدوري الإسباني، وده خلى الجهاز الفني بقيادة هانز فليك في حاله قلق كبير قبل نهائي كأس الملك ضد ريال مدريد.
الصحفي خافي ميغيل، واللي معروف إنه دايمًا أخباره موثوقه، قال إن في شكوك كبيره حوالين إذا كان التمزق عضلي ولا حاجه تانيه، ولو طلع فعلاً تمزق، فده معناه إن ليفا هيغيب على الاقل تلات أسابيع، وده يخلينا نقول بكل تأكيد إنه مش هيكون موجود في النهائي المنتظر يوم 26 أبريل اللي جاي.
الإصابه جات في وقت حساس جداً، خصوصًا إن ليفاندوفسكي كان عامل شغل عالي في الفتره الأخيره، وسجل أهداف مهمه ساعدت الفريق يرجع للمنافسه في الليغا، وغيابه دلوقتي ممكن يسبب خلل كبير في خط الهجوم، خصوصًا إن الفريق داخل على مواجهه مصيريه ضد ريال مدريد.
الجماهير دلوقتي بتتمنى إن الفحوصات تطلع مطمئنه، وإن الإصابه ماتكونش خطيره زي ما التقارير الأولانيه قالت، بس كل المؤشرات بتقول إن ليفا مش هيلحق النهائي.
فليك دلوقتي مضطر يدور على حلول بديله سريعه، يا إما يعتمد على فيران توريس أو يشوف مين ممكن يسد مكان المهاجم الأول للفريق. الأيام الجايه هتوضح أكتر.
