تيودور قلقان قبل ماتش بارما بسبب إصابات اتنين من لاعيبته
المدرب إيغور تيودور طلع في المؤتمر الصحفي قبل ماتش يوفنتوس ضد بارما، وتكلم بصراحه عن حالة اللاعيبه والمشاكل اللي بتواجهه قبل اللقاء المهم في الجوله 33 من الدوري الإيطالي.
تيودور قال في تصريحاته اللي نقلها الصحفي جيانلوكا دي مارزيو: “يلديز اتعرض لكدمه، ولسه مش عارفين هيلعب ولا لأ، هنقيم حالته بكره وكمان كوبمينيرز عنده مشاكل في وتر العضله الخلفيه، وبرضو حالته هتتحدد بكره الصبح”.
المدرب كان باين عليه القلق، خصوصًا إنه أضاف: “مافيش خطه بديله دلوقتي، إحنا بنجهز للماتش زي ما هو، لإننا متوقعين إن المباراه هتكون صعبه جدًا، وبارما فريق مش سهل”.
يوفنتوس هيكون ضيف على بارما في ماتش مهم بالنسبه للفريقين، خصوصًا مع قرب نهاية الموسم والكل بيحاول ياخد أكبر عدد من النقط، سواء للتأهل الأوروبي أو للهروب من صراع الهبوط.
الإصابات دي جت في وقت حساس جدًا لتيودور، اللي لسه بيحاول يثبت نفسه مع الفريق بعد استلام المهمه، والمشكله الأكبر إنه ماعندوش بدائل كتير بنفس المستوى، وده ممكن يخلّي الماتش أصعب من المتوقع.
جماهير اليوفي مستنيه تشوف هيتصرف إزاي لو الاتنين غابوا، وهل الفريق هيقدر يطلع من ملعب بارما بنتيجه إيجابيه ولا لأ؟ كل ده هنعرفه بعد صافرة نهاية اللقاء.
