برشلونه يتلقى صدمه كبيره بعد إصابة ليفاندوفسكي قبل الكلاسيكو
برشلونه بيعيش حاله من القلق الشديد بعد ما اتعرض نجم الفريق البولندي روبرت ليفاندوفسكي لإصابه خلال ماتش سيلتا فيغو، اللي خرج منه في الدقيقه 77 وهو باين عليه التعب والانزعاج، وده خلى جماهير الفريق تتوتر خصوصًا مع اقتراب المواعيد المهمه.
الصحافه الإسبانيه، وبالأخص جريدة “آس”، قالت إن المؤشرات اللي طلعت من غرفة الملابس مش مبشره خالص، خصوصًا مع قرب نهائي كاس الملك ضد ريال مدريد يوم 26 أبريل.
الكلام اللي اتقال عن إصابة ليفا إنه ممكن يكون عنده تمزق في العضله ذات الرأسين في الفخذ الشمال، وده معناه إنه ممكن يغيب تلات اسابيع على الأقل، وده معناه كمان إنه مش هيكون موجود في أهم مباريات الموسم.
ليفاندوفسكي خرج من الملعب وهو حزين جدًا، وده خلى الكل يتوقع إن الإصابة مش بسيطه، وده ممكن يخليه يغيب عن نصف نهائي دوري الأبطال قدام إنتر ميلان كمان.
في ظل الغياب المحتمل ده، المدرب هيكون مجبر يعتمد على فيران توريس كمهاجم أساسي، خصوصًا في ماتشات كبيره زي الكلاسيكو في الدوري اللي جاي يوم 11 مايو على ملعب مونتجويك، وكمان في ماتشات دوري الأبطال.
للتذكير، ليفا قدم موسم ممتاز، لعب 48 ماتش، سجل فيهم 40 جول، وصنع 3 أهداف، وأرقامه بتوضح قد إيه الفريق هيشتاق له في الفتره الجايه.
