مستقبل لامين جمال على المحك وسط جدل حول والده وتصرفاته
بدأت تكثر التقارير بالفتره الأخيره عن موضوع تجديد عقد اللاعب الشاب لامين جمال مع برشلونه، خصوصاً إن الإدارة تعتبر الموضوع من أولوياتها حالياً علشان تضمن بقاء واحد من أهم المواهب اللي ظهرت بالفريق من سنوات.
بس الواضح إن الأمور مو كلها تمام، لأن فيه عائق ممكن يأثر على استمرار لامين في الكامب نو، وهو أبوه جمال نصراوي، اللي كثير من الناس شايفين إنه عامل مشكله حقيقيه بسبب تصرفاته وتصريحاته المتقلبه.
لامين دايمًا يصرّح إنه يحب برشلونه ويبغى يكمل معهم، لكن والده شكله له رأي ثاني، يعني مره تشوفه لابس قميص ريال مدريد، ومره برشلونه، ونفس الشي مع منتخبي إسبانيا والمغرب، وهذا يوضح قد ايش مواقفه متغيره حسب الوضع.
المخاوف حالياً إن الوالد ممكن يكون له تأثير كبير على قرارات ابنه، خصوصاً مع قرب مفاوضات التجديد.
البعض خايف إن الفلوس تصير هي اللي تحكم، خصوصاً وإن فيه أنديه كبيره مثل باريس سان جيرمان ومانشستر سيتي تراقب الوضع وتستعد تتحرك لو حصل أي تعثر في المفاوضات.
اللي واضح للجميع إن المشكلة مو فقط في قوانين اللعب المالي، بل في كيف إدارة النادي تقدر تتعامل مع والد اللاعب وتضمن إن قرارات لامين تنبع من رغبته هو، مو من طموحات أو رغبات غيره.
