القبض على الفنانه التركيه سيفيل أكداغ بعد مقتل صاحبتها بطعنات
قامت الشرطه التركيه بالقبض على الممثله المعروفه سيفيل أكداغ بعد ما تم اتهامها بقتل صاحبتها “إليف” اللي عندها 29 سنه، وده بعد سهرة ما بينهم يوم 18 ابريل اللي فات.
البدايه كانت لما الاتنين خرجوا سوا وشربوا كحول، وبعد كده راحوا يكملوا السهره في بيت إليف، لكن الأمور ما مشيتش كويس وحصلت خناقه كبيره بين الاتنين. حسب كلام الشرطه، سيفيل طعنت إليف كذا مره وهربت من البيت.
الجيران سمعوا صوت خناقه، ولما دخلوا لقوا إليف غرقانه في دمها وماتت من كتر الطعنات، وعلى طول اتصلوا بالبوليس.
وبعد ما راجعوا كاميرات المراقبه، شافوا سيفيل وهي بتجري وبتخرج من المكان.
خلال التحقيقات، سيفيل قالت إنها ما كانتش فاكرا حاجه لإنهم كانوا شاربين كتيير، وإن الخناقه بدأت فجأه، وإنها كانت خايفه لما لقت إليف نايمه على الأرض من غير حركه، فهربت.
أخو القتيله قال إن أخته اتطعنت أكتر من 30 طعنه، وطلب العداله وإن سيفيل تاخد أقصى عقوبه.
سيفيل بدأت حياتها كعارضه أزياء، وبعدين دخلت التمثيل، وشاركت في أفلام كتير ومسلسلات مشهوره زي “إخوتي” و”التفاح الحرام”.
