جماهير فرنسا تختار انريكي افضل مدرب بتاريخ باريس سان جيرمان
نتايج استطلاع راي جديد اتعمل فـ فرنسا كشفت عن مفاجأه كبيره، وهي إن لويس انريكي، المدرب الإسباني، اتصنف كـ أحسن مدرب مر ع تاريخ نادي باريس سان جيرمان، بحسب رأي 62٪ من الناس اللي شاركوا فالاستطلاع.
انريكي تفوق ع اسماء كبيره كانت موجوده قبل كده، وخصوصًا من بعد ما بقا النادي تحت الملكيه القطريه من سنة 2011، واللي جابوا معاهم مدربين عالميين زى أنشيلوتي، بلان، توخيل، وبوكيتينو، بس واضح إن اللي عمله انريكي خلى الجماهير تشوفه الأفضل من بينهم.
الناس شافت فـ انريكي مش بس مدرب بيكسب، لأ كمان بيغيّر شكل الفريق الموسم الحالي، باريس سان جيرمان تحت قيادته لعب كوره ممتعه، حسم لقب الدوري الفرنسي قبل ما الموسم يخلص، ولسه ماخسرش ولا ماتش فـ البطوله، وكمان وصل لنهائي كأس فرنسا، ونصف نهائي دوري ابطال اوروبا.
ويمكن أهم حاجه خلت الجماهير تعجب بانريكي هي طريقته فـ تكوين فريق قوي من غير ما يعتمد ع نجم واحد، زي زمان ماكان كل حاجه بتدور حوالين لاعب واحد زى نيمار او ميسي، لكن دلوقتي الفريق بقا منظومه كامله، وكل لاعب ليه دور.
أنريكي بيأكد كل يوم إنه مش جاي يقضي وقت، لأ، جاي يبني تاريخ جديد فـ نادي دايمًا كان عنده النجوم، بس دلوقتي عنده مدرب بيخلّي الفريق كله نجم.
