مانشستر يونايتد يواصل نزيف النقاط وأموريم تحت نيران الغضب الجماهيري
الوضع في مانشستر يونايتد بقى لا يُرضي لا جمهور ولا حتى إداره، بعد موسم يعتبر واحد من اسوأ المواسم فـ تاريخ النادي فـ البريميرليغ، تحت قياده المدرب البرتغالي روبين اموريم، اللي لحد دلوقتي مش قادر يرجع الفريق للطريق الصح.
الارقام مش بتكدب، فـ خلال 22 مباراه لعبهم اليونايتد مع اموريم فـ الدوري، الفريق كسب بس 6 مباريات، وتعادل في 5، وخسر 11 مره! ودي احصائيات بتحط علامات استفهام كتير حوالين اختيارات المدرب وطريقه لعب الفريق اللي فقد هويته الهجوميه والدفاعيه مع بعض.
اخر هزيمه كانت قدام وولفرهامبتون بهدف من غير رد فـ الجوله 33، واللي زادت الطين بله وخليت الجماهير تطالب بتغييرات جذريه، سواء فـ الجهاز الفني أو فـ تشكيله الفريق اللي بقت مش مقنعه خالص.
مانشستر يونايتد حالياً فـ المركز الـ14 فـ جدول الترتيب، ومعاه 38 نقطه بس، ودا رقم قليل جدًا بالنسبه لفريق كان بيتنافس على البطولات من فتره مش بعيده.
بعض المحللين شايفين إن اليونايتد محتاج ثوره تصحيح كبيره، تبدأ من فوق لتحت، من الاداره لحد اللعيبه، لأن الوضع كدا مايتسكتش عليه، خصوصًا مع موسم بينتهي وبدون أي ضمانات حتى لمركز أوروبي.
الايام الجايه هتكون حاسمه بالنسبه لمستقبل اموريم، بس المؤشرات كلها بتقول إن صبر الجمهور بدأ ينفد.
