مانشستر يونايتد ينهار مجدداً وهزيمه تاريخيه تضرب سجل البريميرليغ
من جديد بيأكد مانشستر يونايتد إن الموسم دا ماشي من سئ لأسوأ، بعد ما خسر على ملعبه “أولد ترافورد” قدام وولفرهامبتون بهدف من غير رد، في مباراة كانت ضمن منافسات الجوله الـ33 من الدوري الإنجليزي الممتاز.
النتيجه دي مش بس زادت من اوجاع الجماهير، لكن كمان دخلت تاريخ النادي من الباب الضيق، لإنها الهزيمه الـ15 لليونايتد فـ الموسم الحالي، ودا أكبر عدد هزائم يتعرضله الفريق في موسم واحد من بدايه البريميرليغ بصيغته الجديده.
أداء الفريق كان باهت، مفيش حلول واضحه، ولا فيه رد فعل حقيقي، بالرغم من ان المباراه كانت على ملعبه ووسط جماهيره الهجوم بلا أنياب، والدفاع بيسيب مساحات كبيره، وكأن اللعيبه فقدت تركيزها تمامًا.
المدرب روبين اموريم لسه مش قادر يثبت بصمته، وكل ماتعدي مباراه بيزيد الضغط عليه من الاعلام والجمهور، اللي خلاص فقد ثقته في الجهاز الفني وكمان في اللعيبه اللي مش بتقدم المستوى اللي يليق بقميص اليونايتد.
الهزيمه دي خلت الفريق يبتعد أكتر عن أي طموحات أوروبيه، والمركز الـ14 بقى واقع مؤلم بيمثل حاله التراجع الكبير اللي عايشها النادي.
دلوقتي الكل بيسأل: هل الاداره هتفضل ساكته لحد نهاية الموسم؟ ولا في قرار كبير جاي قريب؟ الجماهير مش مستحمله أكتر من كدا، وكل يوم بيعدي من غير تدخل بيخلي الجرح أعمق.
