رغم الخروج من أوروبا إدارة بايرن ميونخ بتجدد ثقتها فـ كومباني
بعد ما ودع بايرن ميونخ دوري الأبطال بخيبة أمل لجماهيره، الكل كان متوقع إن الضغوط تزيد على المدرب البلجيكي فينسنت كومباني، لكن المفاجأة كانت فـ موقف إدارة النادي البافاري، اللي خرجت بتصريحات قوية بتأكد فيها دعمها الكامل للمدرب.
صحيفة “بيلد” الألمانية قالت إن الناس اللي جوه النادي مقتنعين بكومباني، وشايفين إنه لسه قادر يكمل المشروع اللي بدأه، رغم كل الكلام اللي بيتقال في الإعلام.
أحد المصادر في النادي صرح: “احنا ورا المدرب، ومفيش نية نغير أي حاجه دلوقتي.”
الموضوع مش مجرد تصريحات شكليه، لأ، الإدارة شايفه إن كومباني عارف يدير الفريق من جوه، وبيأثر بشكل إيجابي على اللعيبة، والروح اللي بيزرعها فيهم باينه في كلامهم عنه بعد كل مباراه، سواء فازوا أو خسروا.
طبعًا، كان الحلم إنهم يوصلوا نهائي دوري الأبطال خصوصًا إنه كان هيبقى على ملعبهم “أليانز أرينا”، لكن بعد الإقصاء، الهدف الأساسي اللي قدامهم دلوقتي هو حسم الدوري الألماني.
الإدارة شايفه إن عندها مشروع طويل المدى، ومش هتسمح إن إخفاق واحد يهد الدنيا كلها والرساله واضحه: “إحنا واثقين فـ المدرب، واللي جاي أحسن.”
