برشلونه قلب الطاوله على سيلتا وبيحلم ياخد كل البطولات
اللي شاف مباراة برشلونه وسيلتا امبارح، شاف حاجه خرافيه فعلاً، الريمونتادا كانت جنونيه، الفريق رجع من بعيد ضد خصم تقيل، وده مش بيعمله غير الفرق اللي عندها روح الانتصار وجوع دايم للبطولات.
برشلونه دلوقتي شكله ناوي على كل حاجه، الدوري والكاس ودوري الأبطال، الفريق داخل موسم 2025 وهو مش بيهزر، رغم جدول المباريات اللي مخلي خافيير تيباس عاملها كأنهم بيلعبو كل يوم، بس لسه متمسكين، وبيقاتلو في كل ماتش.
الفريق يمكن تعب شويه، نضارته قلت، وفي لخبطة في بعض الأوقات، بس لما تيجي لحظة الحسم، بتلاقيهم بيطلعو كل اللي عندهم، زي ما حصل امبارح، بيدري ودي يونغ ولامين ورافينها كلهم عملو سحر بالكوره.
الفوز امبارح ماكانش بس ٣ نقاط، ده كان بمثابة نص لقب، والملعب اللي حصل فيه ده مش البرنابيو، ده مونتجويك، فيه الإيمان وفيه القتال، والكرة الجميلة.
الجاي أصعب، بس كمان أمتع، فيه نهائي كأس الملك ضد فريق مبابي، وفيه عشر مباريات ناريه في الدوري، كل ماتش كأنه نهائي.
الناس لازم تستمتع بكل لحظه، ده موسم ممكن مايتكررش، فريق بيقدم كوره حلوه، وفي نفس الوقت بيعرف يرجع، وبيفوز حتى لما الظروف ضده.
اربطو الاحزمه، الجاي فيه لفات كتير، وبرشلونه ماشي بسرعه الصاروخ.
