نيره الأحمر الزمالك بيمر بأصعب فتراته والعدل الحل الوحيد
اكدت نيره الأحمر، عضو مجلس إدارة نادي الزمالك، إن النادي حالياً فـ مرحله صعبه جدًا، وبتعاني من مشاكل اغلبها سببه صراعات الإدارات اللي كانت قبل كده، وبتأثر على استقرار الفريق بشكل كبير.
وقالت عبر قناة الزمالك أنا مش بدافع عن لاعيبه ولا مجلس إدارة ولا مدربين، أنا بدافع عن الزمالك الكيان، نفسي أشوفه دايمًا فايز وبيفرّح جماهيره، سواء كنت موجوده فالمجلس ولا لأ
وأضافت الكل غلط، بس اللي يهمنا هو مصلحة النادي فوق أي حاجه، لازم يكون في عدل بين كل الأندية، مش الأهلي والزمالك بس، كده الرياضه في مصر هتتغير للأفضل
وأكدت كمان إن في أندية بتفاوض لعيبة الزمالك قبل الماتشات الكبيره، وده بيشتت تركيزهم وبيأثر على استقرار الفريق، وده بيحصل في كل الألعاب مش الكوره بس.
وقالت كمان في لعيبة صالات بيطلبوا توقيع بالدولار ازاي وإحنا لسه بندوّر على موارد سقف الرواتب اتضرب، والمفروض نرجع نتحكم فيه
واختتمت مشكلتنا الأكبر ف الزمالك هي صراعات ابناء النادي، كل واحد شايف إنه الصح، بس الحقيقة إننا بنحصد دلوقتي نتيجة الفوضى دي، ولازم نقف كلنا ونحط حل جذري
