الحكم دي بورغوس يقرب ريال مدريد وبرشلونة من بعض لأول مره سوا
في يوم غريب وعجيب، حصل اللي ما توقعه حد، ريال مدريد وبرشلونة، الغريمين اللي طول عمرهم على خلاف، اليوم لقيناهم متفقين على شي واحد، وهو الحكم الإسباني ريكاردو دي بورغوس، اللي تم تعيينه لقيادة نهائي كأس الملك!
الجماهير على السوشيال ميديا انفجرت غضب، مو عشان الخصم، لكن عشان الحكم اللي معروف بسجله المليان أخطاء وكوارث في حق الناديين.
أول مره نشوف الكل يشكي من نفس الشخص، كأن الاتحاد الإسباني يصر يورينا إن التحكيم هناك حاله مايرثى لها!
دي بورغوس ارتكب كوارث لا تُعد ولا تحصى، خلونا نبدأ بالريال. في 2017 طرد رونالدو في السوبر الإسباني قدام برشلونة بدون سبب مقنع، وإيقافه لخمس مباريات زاد الطين بله.
غير كذا، ألغى هدف صحيح للريال في الكلاسيكو قبل موسمين، كان ممكن يحسم المباراة. والموسم اللي فات لغى هدف ثاني قدام إشبيلية وما حسب بلنتي لفينيسيوس، والسنه هذي حسب بلنتي غريبه ضد تشواميني في الديربي.
وبرشلونة؟ برضو ما سلم، في موسم 2020 – 2021، تجاهل ضربة واضحة من نيوم على ميسي، واللي كانت تستحق كرت أحمر، وكأن شي ما صار.
والمصيبة الثانية، في مباراة ضد أتليتكو، ما حسب لمسة يد على دي بول، واستمر الهجمة وسجل الأتليتي هدف!
الوضع التحكيمي في إسبانيا صار أضحوكة، والمصيبة إن نفس الحكم هو اللي راح يدير نهائي بحجم الكأس يعني يا ربنا سترك من اللي جاي.
