مانشستر سيتي يبلغ برناردو سيلفا بالخروج من خطط الموسم الجاي
في خبر فاجأ جمهور السيتي، كشفت تقارير إنجليزيه إن إدارة مانشستر سيتي قالت للاعب البرتغالي برناردو سيلفا إنه مو من ضمن خطط الفريق للموسم الجاي، وهذا القرار جاي ضمن تغييرات كبيره شكلها بتصير داخل النادي.
السيتي ناوي يسوي مشروع جديد، يركز فيه على اللاعبين الصغار بالعمر، والهدف منه يرجع الفريق للمنافسه القويه بعد موسم كان صعب بكل المقاييس، سواء في الدوري أو البطولات الثانيه.
برناردو سيلفا يعتبر واحد من أهم لاعبين السيتي آخر كم موسم، وكان دايمًا ركيزه أساسيه بخطط المدرب بيب غوارديولا، وساهم بشكل كبير في تحقيق البطولات، بس الحين ومع التوجه الجديد، شكله بينضم لقائمة المغادرين بعد كيفن دي بروين اللي أعلن رسميًا خروجه بنهاية الموسم.
أرقام سيلفا مع السيتي تتكلم عن نفسها:
- لعب 397 مباراة
- سجل 69 هدف
- صنع 71 هدف
- فاز بـ 16 لقب
الجماهير للحين مو مصدقه القرار، وبعضهم شايف إنه خساره كبيره للفريق، خصوصًا إنه برناردو من اللاعبين القليلين اللي يقدرون يلعبون بأكثر من مركز، وعنده خبره كبيره فالمباريات الكبيره.
اللي واضح الحين إن السيتي داخل على مرحلة جديده، والموسم الجاي ممكن نشوف فريق مختلف تماماً عن اللي تعودنا عليه.
