سوني شاربلس المصري أساسي مع بولتون لأول مره بدوري ليج وان
اللاعب المصري الأصل سوني شاربلس، اخيرًا دخل التشكيله الأساسيه لفريق بولتون واندررز، لأول مره في بطولة دوري الدرجة الثانيه الإنجليزي ليج وان وده خلال مواجهة فريقه النهارده الإثنين ضد لينكولن سيتي بالجوله 44.
سوني اللي عنده 20 سنه، كان أغلب مشاركاته مع الفريق الأول من على الدكة، بالرغم من تألقه مع فريق الرديف، وكان لعب مره واحده أساسي في بطولة كأس الدوري الإنجليزي قبل كده، لكن دي تعتبر أول مشاركه ليه أساسي في الدوري نفسه، ودي خطوه مهمه في مسيرته.
اللاعب سبق وتم استدعاؤه قبل كده عشان ينضم لمنتخب مصر مواليد 2005 للمشاركة في بطولة أمم أفريقيا تحت 20 سنة، لكن ماقدرش يكون في القايمة النهائيه بسبب مشاكل في أوراقه.
المباراة دي ممكن تكون بداية انطلاقة حقيقيه لسوني، خصوصًا لو قدر يثبت نفسه ويقدّم أداء قوي يخلي المدرب يعتمد عليه أكتر الفتره الجايه، والكل في انتظار يشوف تأثيره مع الفريق في واحده من أهم مراحل الموسم.
