نهائي كأس الملك بين برشلونة وريال مدريد يصنف كمباراة عاليه الخطوره
أعلنت اللجنة الدائمه لمكافحة العنف في إسبانيا النهارده، إن ماتش نهائي كأس ملك إسبانيا بين برشلونة وريال مدريد، اللي هيتلعب يوم السبت 26 إبريل على ملعب لا كارتوخا في إشبيليه، اتصنف كمباراة “عالية الخطوره”، وده بسبب حساسية المواجهه وطبيعة المنافسه بين الفريقين.
النهائي ده مش بس عادي، ده كلاسيكو نار بين الغريمين التاريخيين، وكل فريق رايح علشان يطلع بالكأس ويعوض جماهيره.
الصحف الإسبانية قالت إن الأمن في إشبيليه هيكون في حالة تأهب قصوى، وهيتم تشديد الإجراءات الأمنيه في كل مكان حوالي الملعب، سواء قبل الماتش أو بعده.
عدد كبير من جماهير الفريقين متوقع توصل إشبيليه من يوم الجمعه، والإتحاد الإسباني خصص 26,031 تذكره لكل نادٍ، حسب ما تم الاتفاق عليه في اجتماع رسمي بين الإتحاد وادارات الناديين.
أسعار التذاكر بتبدأ من 72 يورو وبتوصل لـ270 يورو، وده بيوضح إننا قدام حدث كروي مهم جدًا، وناس كتير من كل أنحاء إسبانيا حابة تحضره وتشوف الكلاسيكو على أرض الواقع.
الملعب الأوليمبي “لا كارتوخا” اللي اتجدد مخصوص علشان يستضيف النهائي، هيكون مليان بالجماهير، وسعته بعد التحديث وصلت لـ70 ألف مشجع، وده هيخلي الأجواء نار بكل معنى الكلمة.
الكل مستني اللحظة دي، والماتش ده هيكون حديث الكوره في أوروبا كلها.
