غياب أرسنال والسيتي بالجولة ٣٤ يأثر على فانتازي البريميرليج
الجوله ٣٤ من الدوري الانجليزي الممتاز اللى هتبدأ يوم السبت الجاي الموافق ٢٦ إبريل، هتكون مختلفه شوية، لإن فيه ٤ فرق مش هتلعب في مواعيد الجولة بشكل طبيعي، وده هيأثر بشكل كبير على لعبه فانتازي البريميرليج.
الفرق اللى مش هتشارك بالجوله ٣٤ هما أرسنال، مانشستر سيتي، كريستال بالاس وأستون فيلا، والسبب إن مبارياتهم تم تقديمها وهتتلعب يوم التلات والأربع قبل بداية الجوله، يعني اللى عنده لاعيبه من الفرق دي مش هياخد منهم اي نقاط فالجولة الجاية.
من أبرز اللاعبين اللى مش هيشاركوا دي بروين، ساليبا، عمر مرموش، مورجان روجرز، إسماعيلا سار وغيرهم، وناس كتير معتمدين عليهم فالفانتازي.
لو فريقك مليان بلاعبين من الأربع فرق دول، عندك حلين يا إما تستخدم فري هيت وتبدلهم مؤقت للجولة دي بس، أو تلعب وايلد كارد وتغير تشكيلك بالكامل بشكل دايم.
الـ deadline بتاع الجولة هيكون السبت الساعه ١ الظهر، فلو ناوي تعمل تغييرات، ألحق جهز فريقك من دلوقتي قبل ما الوقت يضيع عليك.
