غوارديولا يحسم الجدل: مانشستر سيتي مش محتاج قلب دفاع جديد
خرج بيب غوارديولا، مدرب مانشستر سيتي، بتصريح حاسم قطع بيه الكلام الكتير اللي اتقال مؤخرًا عن إمكانية ضم مدافع جديد للفريق، خصوصًا بعد الإصابات اللي ضربت الخط الخلفي الموسم ده.
غوارديولا قال في تصريحات صحفيه: “ماعتقدش إن السيتي محتاج يشتري قلوب دفاع جديده، إحنا عندنا عدد كافي.
وتعاقدنا مع لاعيبين شباب في يناير، فالموضوع مش بالحجم اللي بيتقال عليه”.
الكلام ده بيجي بعد ما بعض التقارير الإعلامية أشارت إن السيتي ناوي يدخل السوق الصيفي بقوة عشان يعزز خط الدفاع، بس واضح إن بيب عنده ثقه في المجموعة الحاليه، ومش شايف فيه أزمة كبيره تستدعي صفقات جديده في المركز ده.
وأضاف غوارديولا: “هنشوف إيه اللي هيحصل، بس لحد دلوقتي مش شايف إن فيه داعي نتحرك في الاتجاه ده”.
تصريحات بيب دي بتطمن جماهير السيتي، وبتأكد إن المدرب لسه متمسك بتوازن الفريق وبيعتمد على الموجودين لإنهاء الموسم بأفضل شكل ممكن، خصوصًا مع دخول الفريق في مراحل الحسم على أكتر من جبهه.
